《生命的價值》
最近帶屋企狗仔去睇醫生，然後醫生話聽到心有雜音，應該係老年退化，本來帶佢去睇牙點知得出呢個消息的確係幾令人擔心。
夜晚同老婆傾計時佢問我：你肯用幾多錢去醫佢呢？
我無乜點諗就答：我有幾多就用幾多囉……
寵物嘅病痛真係好令人煩惱，因為壽命問題，佢哋一定會比我哋早經歷生老病死，到底生命值幾錢？我知道生命大家都會覺得係無價，但現實總有一個價，醫佢要十萬，你俾，佢就值，當去到六十萬時你唔俾，咁佢就細過六十萬呢個價。
有同無，肯唔肯係兩個問題，用盡所有借埋都唔夠咁無野好講，但明明有錢，例如係準備結婚嘅，買樓嘅，咁呢條生命問題就會變得好現實。
有朋友分享過一個故事，佢係獸醫診所度遇到熟人，對方帶住狗仔同仔仔嚟，因為手術費嘅事而商議緊，朋友講，你有小朋友，如果能力許可嘅就做啦，呢樣係教育嚟，然後對方就衝去同醫生講做。
的確呢句係對家長幾到肉嘅，如果教識小朋友對於生命會計算太多嘅話受嘅一定係將來嘅自己。
肯用錢喺某地方上，咁對呢樣野一定好有價值，就好似有個朋友佢收養左流浪貓，前後三年佢洗咗將近十萬係佢身上，佢成日都笑自己隻貓身價貴過名種貓，一樣野係咪珍貴，除咗本身價值外，都仲有一份感情係度。
當問我呢條問題時，我嘅答案係一個未知，因為有幾多就用幾多，係取決於自己擁有幾多，錢，有時仲可以賦予生命，係唔需要抉擇錢同生命二擇其一時，請努力搵錢！
Search